ინკლუზიის ხელშემწყობი ორგანიზაცია ააიპ „ხელი ხელს“ 2010 წლიდან ავითარებს და ნერგავს შშმ პირთა მხარდამჭერ, უფლებებზე დაფუძნებულ მომსახურებებს. ორგანიზაციის მიზანი შეზღუდული შესაძლებლობის მქონე ადამიანების თემში დამოუკიდებლად და ღირსეულად ცხოვრების ხელშეწყობაა.

ამისთვის 2011 წლიდან დავაარსეთ მცირე საოჯახო ტიპის საცხოვრებლები და აქტიურად ვმუშაობთ დეინსტიტუციონალიზაციის მიმართულებით. ხოლო 2016 წლიდან დავნერგეთ შეზღუდული შესაძლებლობის მქონე ბავშვებსა და ზრდასრულებს პერსონალური ასისტირების მომსახურება. აღნიშნული მომსახურებები სოციალური ინოვაციიდან წარმატებულ პრაქტიკად იქცა და 2021 წელს ჯანმრთელობის მსოფლიო ორგანიზაციამ „ხელი ხელს“ სერვისები სანიმუშო მოდელად აღიარა.

ორგანიზაცია „ხელი ხელს“ პერსონალური ასისტირების მომსახურებას 2016 წლიდან ახორციელებს კერძო თუ დონორული დაფინანსებით. 2022 წლიდან აწვდის „ქცევითი სირთულის მქონე მძიმე და ღრმა შეზღუდული შესაძლებლობის მქონე 7-18 წლამდე ბავშვთა ბინაზე მომსახურებით უზრუნველყოფის სახელმწიფო პროგრამას“, ხოლო 2024 წლიდან დაიწყო ზრდასრული შეღუდული შესაძლებლობის მქონე პირთა პერსონალური ასისტირების პროგრამაც.

პერსონალური ასისტირების სერვისი სტანდარტის მიხედვით მოიცავს პერსონალური ასისტენტის ბუნებრივ გარემოში ვიზიტებს და მუშაობას წინასწარ შეთანხმებული გეგმის მიხედვით. პერსონალური ასისტირების მომსახურება, განსხვავებულია პირის საჭიროებებისა და ცხოვრების სიტუაციის შესაბამისად, ამიტომ ის ინდივიდუალური და მრავალფეროვანია. ასისტირების აქტივობები შესაძლოა მოიცავდეს: მხარდაჭერას კომუნიკაციაში, გადაადგილებაში, თვითმოვლის საკითხებში, დაგეგვმაში, დასვენება/მუშაობაში, სოციალიზაციაში, ფუნქციური უნარ-ჩვევების გენერალიზებაში, კოგნიტურ, ემოციურ, სენსორულ და პიროვნულ სფეროებში. შესაბამისად, ასისტირება შეიძლება მიმდინარეობდეს სხვადასხვა გარემოში, როგორიცაა: სახლი, სკოლა, ბაღი, ეზო, ქუჩა და სხვა. ყველგან, სადაც შშმ პირს ესაჭიროება და სურვილი აქვს და შეთანხმება იქნება. ეს აქტივობები დაკავშირებულია ადამიანის იდენტურობასა და პიროვნებასთან.